İqtisadi Əməkdaşlıq və İnkişaf Təşkilatı bir müddət əvvəl dünyanın 57 ölkəsinin 15 yaşlı şagirdlərinin bilik səviyyəsinin reytinqini dərc edib. Reytinq siyahısı nəticəsində məlum olub ki, daha güclü biliyə Finlandiya məktəbliləri malikdir. İlk ən yaxşı onluğa Finlandiya (563 bal), Honkonq, Kanada, Tayvan, Estoniya, Yaponiya, Yeni Zelandiya, Avstraliya, Niderland və Lixtenşteyn daxil olub. Beş ölkədə bilik səviyyəsi orta, 22 ölkədə ortadan aşağı qiymətləndirilib.
Sonuncu qrupa ABŞ (489 bal), Rusiya (479 bal), Latviya (490 bal), Litva (488 bal), Azərbaycan (382 bal) və digərləri daxildir. Reytinqdə Qırğızıstan 322 bal toplamaqla 57 ölkə arasında ən aşağı nəticə göstərib. Təşkilatın reytinq siyahısının obyektiv hazırlandığını bildirən Təhsil Nazirliyinin şagird nailiyyətlərinin qiymətləndirilməsi şöbəsinin müdiri Talıb Şərifov bildirib ki, Azərbaycan siyahıda ortadan aşağı nəticə göstərən ölkələrin sırasına daxil olsa da, 57 ölkə arasında riyaziyyat fənni üzrə Finlandiya, Koreya, Honkonqdan sonra 4-cü, texniki fənlər üzrə ABŞ və Rusiyanı qabaqlayaraq 33-cü, nəzəri biliklərə görə 4-cü, nəzəri biliklərin tətbiqinə görə 35-ci yeri tutub. Rusiya və Portuqaliya Azərbaycandan sonrakı yerdədirlər. Daha aşağı nəticə isə 54-cü yer olmaqla ana dili fənni üzrə olub. Ana dili üzrə nəticələrin zəifliyi səbəbindən Azərbaycanın ortadan aşağı nəticə göstərən ölkələrin sırasına daxil olduğunu bildirən T.Şərifov qeyd edib ki, dünyada bu fənnin öyrənilməsi və qiymətləndirilməsi üsulları fərqlidir. Bu səbəbdən azərbaycanlı şagirdlərin bu fənn üzrə bilik səviyyəsi qiymətləndirilərkən ölkəmiz 54-cü yeri tutub. Qeyd edək ki, belə reytinq cədvəlləri 3 ildə bir dəfə hazırlanır. Reytinq şagirdlərə riyaziyyat, texniki elmlər və ana dilinə dair sualların daxil edildiyi xüsusi testlərə əsaslanır. Test həm də şagirdlərin nəzəri biliklərini təcrübədə tətbiq etmək bacarığını qiymətləndirir. İmtahan verən şagirdlər suallara iki saat ərzində cavab verməlidirlər. Bu reytinq cədvəlinin hazırlanması üçün test 2006-cı ildə keçirilib.