1,2 milyard insanın and yeri olan «Qurani-Kərim» faşist təlimi ilə müqayisə edilib.

    «Bu günlərdə bədnam hollandiyalı sağ radikal Heyert Vilders növbəti dəfə ifrat islamofob ifadələrə yol verib». Bu barədə Dini Etiqad Və Vicdan Azadlıqlarını Müdafiə Mərkəzinin (DEVAMM) sədri, İçərişəhər «Cümə» məscidinin imam-camaatı İlqar İbrahimoğlunun yaydığı bəyanatda bildirilir.

    Bəyanatda qed edilir ki, Danimarkada yer almış bədnam karikatura qalmaqalının yaratdığı sarsıntıdan sonra holland islamofobu Heyert Vilders öz növbəti sərsəm «kəşfi»ni ortalığa atıb: «O, müsəlmanların müqəddəs kitabı olan «Qurani-Kərim»ə dil uzatmağa cürət edib. 1,2 milyard insanın and yeri olan «Qurani-Kərim» faşist təlimi ilə müqayisə edilib. Bu islamofob Quranın hər səhifəsində zorakılığa səsləyən bir faşist kitabçası olduğunu söyləyib. O, həmçinin, müsəlmanların müqəddəs kitabını Hitlerin «Mayn kampf» əsəri ilə də müqayisə edib. Bundan başqa, xəbər verildiyinə görə, Vilders bir film çəkir və müqəddəs kitabın «dözümsüzlüyün, qətllərin və terrorun ilhamverici mənbəyi olduğunu göstərmək üçün» çəkilən filmdə Quran tikə-tikə ediləcək», - deyə vurqulanır.

    Bəyanatın yekununda dünya ictimaiyyətinin bu məsələlərə sərt reaksiya verməsinə ümid bildirilir: «Ümid edirik ki, dini etiqadlarından asılı olmayaraq bütün dünyada olan ləyaqətli insanlar belə meyllərin və tendesiyaların bütün məhvediciliyini və dağıdıcılığını daxilən başa düşəcək və bütün qüvvələrini toparlayaraq, bu böhrandan şərəflə çıxmağı bacaracaqlar».

    Qeyd edək ki, Heyert Vilders bildirib ki, Quranın saxlanması qadağan olunmalıdır və onu evdə və ya məsciddə saxlayan insan cəzalandırılmalıdır.