Britaniyanın "The Lancet" adlı tibbi jurnalında dərc edilmiş yeni elmi araşdırmanın nəticələri göstərir ki, insanların körpə ikən daha tutumlu qida alması onların böyüyəndə daha yüksək əmək haqqı almaq şanslarını, demək olar ki, 50 faiz artırır.
Bu qənaətə alimlər Qvatemalada uzun müddət apardıqları araşdırma nəticəsində gəliblər.

1970-ci illər ərzində araşdırmada iştirak edən uşaqların bir qrupuna çox tutumlu, digər qrupa isə nisbətən az tutumlu qida verilirdi.

30 ildən sonra araşdırmalarının nəticələrini yoxlamaq üçün Qvatemalaya qayıdan alimlər görüblər ki, o adamların ki, araşdırma əsnasında nisbətən tutumlu qida verilirdi, əmək haqqları digər qrupda olanlarla müqayisədə 50 faizə qədər artıqdır.

Düzdü, artıq böyümüş o vaxtkı qız uşaqlarının qazancları o qədər də böyük fərq təşkil etmir, lakin alimlər bunu belə izah edirlər ki, sosial amillərə görə həmin qızların iş baxımından böyük seçimi olmayıb.

Lakin araşdırma bir daha sübut edir ki, körpələrin qidalanması və onların artıq böyük insan olduqda gəlirləri arasında birbaşa əlaqə var.

Odur ki, alimlərin dediyinə görə, körpə qidası iqtisadi artıma təkan verə bilən amildir.