Oleq Deripaska Roman Abramoviçdən iki dəfə varlıdır.
 Rusiyanın ən varlı şəxsi hesab edilən Oleq Deripaska varidatına görə Roman Abramoviçi iki dəfə üstələyib. 40 yaşı yenicə tamam olan Deripaskanın 40 milyard dollar pulu var.
   Türkiyənin “Hürriyet” qəzeti yazır ki, Oleq Deripaska nüvə fizikası üzrə mütəxəssisdir. SSRİ dağılandan sonra keçmiş prezident Boris Yeltsinin kürəkəni Valentin Yumaşevin birinci nikahdan olan qızı Polina Yumaşeva ilə evlənərək, özünə maliyyə imperiyası qurub. Hazırda o, Rusiyanın ən varlı şəxsləri siyahısında birinci yeri tutur. Dünən Deripaskanın varidatının 40 milyard dollara çatdığı açıqlanıb. Deripaska 2007-ci ildə şəxsi varidatını 7 milyard dollar artırıb. İkinci yerdə gələn Abramoviçin varidatı 2 milyard dollar artaraq 23 milyarda çatıb. Rusiyanın alüminium sənayesinə nəzarət edən Deripaska Abramoviçdən fərqli olaraq, media ilə təmaslardan yayınır. Onun həyat yoldaşı ilə fotosuna rast gəlmək qeyri-mümkündür. Abramoviçdən fərqli olaraq, o, xaricdə deyil, Rusiyada biznes qurmağa çalışır.