Amerikanın Cənubi Karolina ştatında yanğınsöndürənin cibində olan DVD-disk kişiyə dəyən güllənin qarşısını alıb. Restoranı tərk etdiyi an Barri Makroy iki kişinin mübahisəsinin şahidinə çevrilib. Onların birinin əlində tapança olub. Qəfildən atəş səsi eşidilib. Güllə mübahisə edənlərin birinin bədənini dələrək restoranın şüşələrini qırıb və yanğınsöndürənə tuş gəlib. Makroy əvvəlcə ümumiyyətlə ona güllə dəydiyindən bixəbər olub və sadəcə olaraq bir qədər qorxu hissi keçirib. Yalnız bir müddət sonra yanğınsöndürən gödəkçəsində güllənin açdığı dəliyi aşkarlayıb. Sonra isə cibində DVD-nin qırıqlarını və gülləni tapıb. Barri canını belə asan qurtarmasına sevinsə də, diskin zədələnməsinə heyifsilənir. DVD-də yanğınsöndürənlərə həsr edilmiş teleşounun görüntüləri əks edilibmiş.