Yaponiyada zəlzələlərlə heç kimi təəccübləndirmək mümkün deyil. Ada sakinləri mütəmadi olaraq bu təbii fəlakətlə üzləşirlər. Amma buna rəğmən ölkənin bəzi vətəndaşları Yerin "qəzəbinin" necə təcəssüm etməsinə şahidlik edə bilmirlər. Belə bir "təcrübəsizliyi" aradan qaldırmağa yük avtomobilində quraşdırılmış "Zəlzələ effekti" adlı cihaz yardım edəcək. "Earthquake Experience" avtomobili üzərində qab-qacaq olan masa və 4 oturacaqla təchiz edilmiş kiçik otaq quraşdırılıb. Yeraltı təkan təcrübəsinə malik olmaq istəyənlər həmin otağa qalxdıqdan sonra xüsusi ötürücülər qurğunu müxtəlif istiqamətlərdə yırğalamağa başlayır. Özü də bu qüvvələr kifayət qədər ciddi zəlzələ zamanı baş verən təkanların ekvivalentini təşkil edir. İlk baxışdan bu bir əyləncə təsirini bağışlayır. Amma əslində ölkəni diyarbədiyar dolaşan avtomobil sakinləri psixoloji cəhətdən zəlzələyə hazırlamaq məqsədi güdür. Eyni zamanda layihə maarifçilik xaratkeri də daşıyır. Bu attraksionda təcrübə toplayan yaponiyalı real zəlzələ zamanı artıq özünü itirməyəcək və tələb olunan hərəkətlərlə təhlükəsizliyini təmin edəcək. Yeri gəlmişkən, Yaponiyada artıq orijinal sistem tətbiq edilməkdədir. Sistemə daxil olan cihazlar sahibinə yeraltı təkandan 20 saniyə əvvəl xəbərdarlıq etmək imkanına malikdir.


Mənbə: Həftə içi