"Ağac"ın "köklərini" qurudurlar

KİV tərəfindən "insan-ağac" adlandırılan Yava adasının 37 yaşlı sakini Dede Kosvara 4 cərrahiyyə əməliyyatından sonra tədricən normal həyata qayıtmağa başlayıb. 20 il ərzində Dede ağacı xatırladan və bədəninin faktik olaraq bütün sahələrini örtən fırlarla yaşayıb. İndi isə indoneziyalı ağrı hiss etmədən əllərindən istifadə etməyi və yeriməyi bacarır. Həkimlərin onun bədənindən 1,8 kiloqram törəmələri kəsmələrindən sonra o, uzun illərdən sonra əllərinin cizgilərini görməyə başlayıb. Hazırda İndoneziya xəstəxanalarının birində müalicə olunan Dede artıq gələcəyə dair planlar da qurur: "Əvvəla tamamilə sağalmaq və iş tapmaq istərdim. Sonrasını isə Allah bilir. Bəlkə hələ ürəyimə yatan qadına rast gəldim və ailə də qurdum". Dede üzərində ilk cərrahiyyə əməliyyatı yanvar ayında aparılıb. Sonuncu dəfə isə indoneziyalı müdaxiləyə martda məruz qalıb. İndi həkimlərin əsas məqsədləri şişlərin yenidən əmələ gəlməsinin qarşısını almaqdır. Tamamilə bərpa olmaq üçün Dede daha bir neçə dəfə əməliyyat olunmalıdır. Həkimlər onun bədənindəki sağlam sahələrdən dərini əməliyyat olan sahələrə köçürəcəklər. İndoneziyalının xəstəliyinə isə gənclikdə dizindən aldığı zədə səbəb olub. Qanının zəhərlənməsindən sonra onun ayaq və əllərində şişlər əmələ gəlməyə başlayıb. Bir müddət sonra fırlar ağac kötüklərini xatırladan forma alıblar. Həyat yoldaşı tərəfindən tərk edilən və işini itirən kişi iki övladını təkbaşına tərbiyələndirib. Dedenin xilaskarı rolunda isə Amerikanın Merilend ştatının universitetinin doktoru Entoni Qaspari çıxış edib. O, indoneziyalının qanında leykositlərin miqdarının həddən artıq aşağı olduğunu təyin edib. Elə müalicə də bundan sonra başlayıb.




Mənbə: Həftə içi