Niyazovun ilin ayları və günlərinə verdiyi qəribə adlar ləğv edilir.
Türkmənistan prezidenti Qurbanqulu Berdıməhəmmədov ayların və həftənin günlərinin ümumi qəbul edilmiş adlarının qaytarılması təşəbbüsünü dəstəkləyib. Köhnə təqvimi qaytarmaq təklifi ilə prezidentə parlamentin sədri Ağca Nurberdıyeva müraciət edib.
   Nurberdıyeva bildirib ki, köhnə təqvimə qayıtmaqla bağlı zəhmətkeşlərin müraciətləri və məktubları daxil olur. O, Qorqud ayının 1-dən (iyul ayı) köhnə təqvimə qayıtmağı təklif edib. Parlamentin spikerinin sözlərinə görə, bu qərar Türkmənistanın dünya birliyinə inteqrasiyasına yönələn islahatlara uyğun gəlir. Qurbanqulu Berdıməhəmmədov isə köhnə adlara qayıtmaq məsələsinin parlamentin gündəliyinə salınması ilə razılaşıb. Prezident qısa müddət ərzində müvafiq qərar hazırlanması barədə göstəriş verib.
   Xatırladaq ki, ayların adı 2002-ci ilin avqustunda mərhum prezident Saparmurad Niyazov tərəfindən dəyişdirilib. Bu adlar onun hakimiyyəti dövrünü, eləcə də türkmənlərin tarixini əks etdirməliymiş. Niyazovun qərarı ilə yanvar ayı "Türkmənbaşı", aprel ayı onun anasının adı ilə "Qurbansoltan", noyabr ayı hərbi komandanın adı ilə "Sancara", iyun ayı "Oğuz", fevral ayı "Bayraq", sentyabr isə "Ruhnamə" adlandırılıb. Müvafiq olaraq digər ayların da adı dəyişdirilib. Üstündən bir il keçəndən sonra Türkmənbaşı həftənin günlərinin adlarını da dəyişib. Bazar ertəsi “baş gün”, bazar günü isə “dinc gün” adlandırılıb. Şənbə isə Niyazovun “Ruhnamə”sini oxumaq üçün ayrılaraq “ruh gün” adlandırılıb.


Mənbə: Gün səhər