Məşhur alman dramaturqu və şairi Fridrix Şillerin kəllə sümüyünü tədqiq edən alimlər belə nəticəyə gəliblər ki, qəbirdəki adam qalıqları ona aid ola bilməz. Alman və avstriyalı alimlərin fikrincə, Veymardakı məzarlıqda basdırılan şəxs Şiller ola bilməz. Alimlər əmindirlər ki, onların tədqiq etdiyi skelet bir neçə insanın sümüklərindən təşkil olunub.  “Mariya Styuart” və “Vallenşteyn” kimi əsərlərin müəllifi olan Şillerin harada basdırılması haqda tarixdə konkret fakt yoxdur. Sadəcə, o bəllidir ki, 1805-ci ildə vəfat edən ədibi Veymardakı ümumi qəbiristanlıqda basdırıblar. Üstündən 20 il keçəndən sonra şəhərin meri dahi şairin qalıqlarını çıxarıb yenidən daha layiqli bir yerdə dəfn etdirmək qərarına gəlir. Amma həmin qəbri açanda orada 23 skelet tapılır. Belə qərara gəlirlər ki, ən böyük kəllə skeleti məhz Şillerə aiddir. Lakin ötən əsrdə müasir texnologiyalar vasitəsilə həmin skeletin Şillerə aid olmadığı təsdiqlənib. Alimlər bu skeleti Şillerin qohumlarının DNT-si ilə müqayisə edib belə qərara gəliblər ki, həmin skelet başqasına məxsusdur. Bu yaxınlarda isə Avstriyanın tanınmış təbibi tapdığı kəllənin Şillerə aid olduğunu iddia etmişdi. Aparılan tədqiqatlar isə bu sümüklərin də ona aid olmadığını sübut edib. Bəzi mütəxəssislər belə hesab edirlər ki, Şillerin qalıqları hələ ötən əsrin əvvəllərində qəbirdən oğurlanıb.


Mənbə: Gün səhər