Bu günlərdə Avstraliyanın Şimali Ərazilər ştatında "nəhənglərin döyüşü" baş verib. Bu döyüşə isə təsadüfən Pol van Bruggen adlı balıqçı şahidlik edib. Hadisə Deli River çayının sahilində baş verib. 2,5 metr uzunluğunda olan dəniz timsahı nəhəng köpəkbalığı üzərində qələbə çalıb. Bruggen baş verənləri belə təsvir edib: "Biz çayın sahili ilə gedirdik. Qəfildən suda bir hərəkət baş verdi və səslər eşitdik. Əvvəlcə suyun üzərində köpəkbalığının quyruğu göründü. Sonra isə timsahı da gördük. Mübarizə zamanı timsah balığı tutaraq sahilə çıxardı. Qəribədir, adətən timsahlar qurbanlarını suyun dərinliklərinə sürükləyirlər. Bu dəfə isə timsah sanki intellektini işə saldı. Sahildə köpəkbalığının heç bir şansı qalmadı. Biz baş verənlərin lap yaxınlığındaydıq. Amma timsah buna əhəmiyyət vermədi və sakitcə nahar etməyə başladı".



Mənbə: Həftə içi