Robototexnika və avtomatika beynəlxalq sərgisində İsveçrədən olan Lozannanın politexnik məktəbinin nümayəndələri tullanan robotun nümayişini keçiriblər. Dario Floreano və yetirmələri uzun müddət çəyirtkələrin davranışını izləyiblər və nəticədə həşərata bənzər çəkisi 7 qram olan robot yaratmağa müvəffəq olublar. Kiçik ölçülərə malik tullanan heyvanlar (bitlər, cırcıramalar, çəyirtkələr, qurbağalar) əzələlərində tədricən enerji toplamaq, sıçrayış zamanı isə bu enerjini qısa zaman kəsiyində onu azad etmək bacarığına malikdirlər. Sözügedən robot da məhz bu hərəkətləri təkrarlayır. 5 santimetrlik "çəyirtkə" 1,4 metr hündürlüyə sıçramaq qabiliyyətinə malikdir. Bu isə onun ölçülərindən 27 dəfə artıqdır. Alimlərin bildirdiklərinə əsasən, təbiətdə ən maksimal göstəriciyə bədən ölçülərindən yalnız 10 dəfə artıq sıçrayışı həyata keçirmək qabiliyyətinə malik heyvanlar mövcuddur. Litium və polimerlərdən hazırlanmış batareya robota 3,5 saniyə intervalla təqribən 108 sıçrayış etməyə imkan verir. Bu isə 6,3 dəqiqə fasiləsiz hərəkət və 148 metr "yol" deməkdir. Müəlliflər qəliz relyefə malik ərazilərdə yeni ixtiranın axtarış və xilasetmə işlərində tətbiqinin mümkünlüyünü bildirirlər: "Biomimetik robotlar addımlayan və çarxlı robotlar üçün əlçatmaz olan əraziləri fəth edə bilərlər".



Mənbə: Həftə içi