Kosmosa səyahət edənlərin sayı o qədər çox olmasa da, Rusiya vətəndaşları bu sahədə liderliyə yüksəlmək niyyətindədirlər.
 Bu ölkənin 9 vətəndaşı "SpaceShipTwo" şəxsi kosmouçağında kosmosa səyahət etmək üçün ABŞ-ın "Virgin Galactic" turizm şirkətinə qabaqcadan sifariş veriblər. Qeyd edək ki, sözügedən şirkət kosmosa səyahət təşkil edən ilk kompaniyadır. Hələ ki kosmoturistlərin ilk uçuşunun vaxtı dəqiq bəlli deyil. Qeyd edək ki, hazırda ABŞ-da iki növ kosmouçaq hazırlanır. Söhbət 1 ədəd "White Knight Two" və 5 ədəd "Virgin Galactic"dən gedir. Özü də "Virgin Galactic"i kosmoturistlərə gələn ay ərzində canlı göstərməyi vəd ediblər. Kosmosa ilk uçuşlar zamanı həftədə 1 dəfə səfər ediləcəyi gözlənilir. Uçuşların təşkil ediləcəyi ilk ildə Yer kürəsini 500 insanın uzaqdan görəcəyi gözlənilir. Yaxın 10 ildə isə kosmoturistlərin sayının 50.000-dən artıq olacağı proqnozlaşdırılır. Maraq üçün qeyd edək ki, kosmosa uçuş biletinin qiyməti 200 min dollar təşkil edir. "Virgin Galactic"in sahibi Riçard Brensonun sözlərinə görə, ilk reyslərə olan biletlərin hamısı alınıb. Sərnişinlər arasında ən "ağsaqqalı"nın yaşı isə nə az, nə çox - düz 88-dir!


Mənbə: Həftə içi