İraqda müharibə ilə əlaqədar olaraq ərlərini itirən dul qadınların sayının 3 milyonu keçdiyi açıqlanıb. Vəziyyətin bu cür olduğunu görən hökumət çıxış yollarını axtarmağa başlayıb. Parlamentdəki demokratik bloku təmsil edən məclisin qadın hüquqları üzrə komissiyasının rəhbəri Məcidə Hüseyn ölkədə davam edən qanlı hadisələr səbəbi ilə dul qalan qadınların sayının getdikcə artacağını və bunun qarşısını almağın vacib olduğunu bildirib. O bu kateqoriyaya daxil olan qadınların yoxsulluq içərisində yaşadıqlarını deyib. İraqın baş naziri Nuri əl-Maliki isə ölkəsindəki dul qadınların pis yola düşməmələri üçün yeni təkliflə çıxış edib. Belə ki, Maliki dul qadınla evlənəcək iraqlı kişilərə 38 milyon İraq dinarı (25 min ABŞ dolları) pul yardımı edəcəklərinə söz verib. Baş nazirin bu açıqlamasından sonra İraq parlamenti də dul qadınlara kömək etməklə bağlı qərar verib. Məclis ərlərini müharibədə itirmiş qadınlara kömək məqsədi ilə onlara hər 2 aydan bir 75 min İraq dinarı (50 ABŞ dolları) verməklə bağlı qərar çıxarıb.

Mənbə: Həftə içi