Bir çox ailələrdə dünyaya yenicə göz açan uşağa hansı adın verilməsi məsələsi əsl problemə çevrilir. Lakin Orlando sakini bu hadisəni özünəməxsus tərzdə qarşılamağa qərar verib. O, gələcək övladına ad vermək hüququnu 100 dollarlıq benzin qəbzinə dəyişib. Devid Partin təsadüfən yerli radionun ən maraqlı təklifə 100 dollarlıq qəbz təklif etdiyini eşidib. Çox düşünmədən gələcək ata radioya orijinal təklifi ilə müraciət edib. Proqramın iki aparıcısı - Riçard Dikson və Cill Uilloubay bunu eşitcək müsabiqənin qalibini tapdıqları qənaətinə gəliblər və qəbzi Devidə ötürüblər. Qərara alınıb ki, uşaq dünyaya gəldikdə ona "Dikson və Uilloubay Partin" adı veriləcək. Partinin həyat yoldaşı Samanta bildirib ki, ən azından oğullarının adının ərsəyə gəlməsi maraqlı tarixçəyə çevriləcək. Dikson və Uilloubay isə körpə dünyaya göz açdığı an doğum evində olmağı planlaşdırırlar. Bütün bu əhvalatda ən böyük təəssüf doğuran hal isə yeni həyata qədəm qoyan kiçik insanın heç bir seçim imkanı olmamasıdır. Neyləmək olar, Tanrı ona məhz belə valideyn nəsib edib.