Son bir həftə Amerika sanki Tanrının qəzəbinə tuş gəlib. Okeanın o tayında indiyə qədər misli görünməyən hadisə baş verib. Cəmi 4 gün ərzində ildırım zərbəsi nəticəsində 5 nəfər dünyasını dəyişib. Bədbəxt hadisələrin qurbanları 16 - 23 yaş arasında olan Kolorado, Cənubi Dakota, Virciniya, Şimali Karolina və Viskonsin ştatlarında yaşayan gənclərdir. İnsanların həyatlarına son qoyan təbii fəlakətlər sırasında Amerikada ildırım vurmalar sellərdən sonra ikinci yeri tutur. Hər il okeanın o tayında ildırım orta hesabla 100 nəfərin ölümünə səbəb olur. Daha 1000 nəfər müxtəlif bədən xəsarətləri alır. Əksər hallarda bu xəsarətlər çox ciddi olur və sonradan müəyyən fəsadlarla müşayiət edilir. Amerikanın milli okean və atmosfer agentliyinin hesablamalarına əsasən, ölkənin hər 280 min sakinindən biri ildırımın "qəzəbinə" gəlmək şanslarına malikdir. Ən yüksək göstərici isə Floridadadır. Bu ştatın hər 80 min sakinindən biri ildırımın zərbəsinin qurbanı ola bilər. ABŞ-da bu baxımdan ən təhlükəli ay iyuldur.





Mənbə: Həftə içi