Zimbabvenin Mərkəzi Bankı dünəndən etibarən dövriyyəyə dəyəri 100 milyard yerli dollar olan əsginasları buraxıb. Bazar günündən isə onlar xarici valyutanın dəyişdirilməsi zamanı tətbiq edilib. Üzərində 11 "sıfır" olan əsginasa indi bu Afrika dövlətində 1 çörək almaq belə mümkün deyil. Təqribən 1 Amerika dolları ilə eyni olan bu məbləğə yalnız 4 portağala sahib çıxmaq mümkündür. Hələ 2008-ci ilin mayında Zimbabve bankı dövriyyəyə 50 milyonluq əsginas buraxdıqda 1 ABŞ dolları 50 milyon Zimbabve dollarına bərabər idi. O zaman bu pula 3 çörək almaq olardı. 2003-cü ildən etibarən bu Afrika dövlətinin dövriyyəyə buraxdığı əskinaslar pul ekvivalenti deyil, sadəcə olaraq qəbz rolunu oynayır. Onların istifadə müddəti olduqca məhduddur. Dünəndən əhalinin ixtiyarına verilən 100 milyard dollarlıq əsginasların son istifadə tarixi bu ilin sonuna qədərdir. Zimbabve dünyanın ən sürətlə inkişaf edən inflyasiyaya malik olan dövlətdir. İllik inflyasiya göstəricisi iyulun 16-na verilən məlumatlara əsasən, 2,2 milyon faizdir.