Çoxuşaqlılıq əvvəllər Azərbaycana və ümumiyyətlə, Şərq dünyasına xas bir şey olub. Amma belə şeylərə Qərbdə də rast gəlinir. Hərçənd "Köhnə dünya"da nəsil artımının hər il daha da azaldığı müşahidə edilir. İngiltərədə yaşayan Coanna Vatson adlı xanım isə uşaq doğmağı, deyəsən, hobbiyə çevirib. Hazırda Vatsonun 37 yaşı var. Sonuncu dəfə 7 ay bundan əvvəl uşaq dünyaya gətirsə də, indi yenidən hamilə qalıb. İngiltərədə çox nadir hallarda rast gəlinən çoxuşaqlı ailəyə sahib olan xanım Vatson indiyə qədər 13 uşaq doğub və 14-cünü doğmağa hazırlaşır. Hazırda 3 aylıq hamilə olan qadın bunları deyib: "Hamilə olmağı çox sevirəm. Üstəlik, çox şanslı insanam. Çünki bəzi qadınlar kimi uşaq dünyaya gətirdikdən sonra artan çəkimi asanlıqla azalda bilirəm. Həm də doğuş zamanı əksər xanımlar kimi ağrı hiss etmirəm". Coannanın həyat yoldaşı 42 yaşlı Con Vatson da çoxuşaqlı ailəyə sahib olmasına görə özünü xoşbəxt kişi sayır. Dediyinə görə, 13 dəfə uşaq dünyaya gətirməsinə baxmayaraq, xanımı hələ də cazibədardır: "Özümü dünyanın ən xoşbəxt atası hesab edirəm. Bütün uşaqlarım dünyaya sağlam gəliblər. Üstəlik, həyat yoldaşım indiyə qədər 13 uşaq dünyaya gətirməsinə rəğmən hələ də cazibədarlığını qoruyub". 14-cü uşağını dünyaya gətirməyə hazırlaşan Coanna Vatson hər doğuşdan sonra bir daha hamilə qalmayacağına söz verdiyini, amma bir qədər sonra hamilə paltarını geyinmək istəyinin baş qaldırdığını bildirib: "37 yaşım var və hələ ki hamilə paltarlarımdan əl çəkmək fikrində deyiləm".