İngiltərədə 21 yaşlı Emma Sempson adlı qızın oyuncaq ayısı baş verən qarət hadisəsini törədən cinayətkarın yaxalanmasında polisə yardım edib.
Belə ki, qız tərəfindən oyuncağın göz hissəsinə yerləşdirilən mini-kamera Emmanın 75 yaşlı nənəsinin evinə mütəmadi olaraq daxil olub pullarını oğurlayan şəxsin kimliyinin müəyyənləşdirilməsində vasitə olub. Leykemiya xəstəliyindən əziyyət çəkən Telma Sempson Liverpuldakı evindən tez-tez pullarının yoxa çıxması haqda nəvəsinə danışıb. Oğrunun yaxalanması üçün gözəl fikir irəli sürən Emma atası ilə birgə xüsusi mağazadan kiçikölçülü videokamera alaraq onu oyuncaq ayının göz hissəsinə yerləşdirib. Bundan sonra oyuncaq Telma Sempsonun pullarını saxladığı otağın bir küncünə qoyulub. Növbəti oğurluq hadisəsindən sonra kameranın lentinə baxış keçirən Sempson ailəsi kadrlarda 28 yaşlı Yovon Alleni görüblər. Allen yaşlı qadına baxmaq üçün sosial xidmət mərkəzi tərəfindən təhkim edilmiş işçi olub. Videoyazını polisə təqdim edən ailə tezliklə oğrunun yaxalanmasını tələb edib. Hüquq-mühafizə orqanları tərəfindən yaxalanan Alleni indi 6 aylıq həbs gözləyir. Bundan başqa, o, yaşlı qadına 60 funt-sterlinq məbləğində kompensasiya ödəməli olacaq.


Mənbə: Həftə içi