Şərqi İndoneziyanın Senqata şəhərində yaşayan bir qadın qeyri-adi xəstəliyi ilə tibb dünyasını heyrətə gətirib. Onun qarnında və sinəsində dəmir kimi sərt tüklər bitir. Bu, 40 yaşlı Nursyaidanın Vahab Syahraniya xəstəxanasına ümumi tibbi yoxlanışdan keçmək üçün gəldiyi zaman bəlli olub. 1991-ci ildən bəri bu xəstəlikdən əziyyət çəkən qadının bu vaxt ərzində sinəsində və qarın nahiyəsində minlərlə sərt tük çıxıb və tökülüb: "Tüklər çıxmazdan əvvəl dəhşətli ağrılar keçirirəm. İndiyədək bir çox həkimə müraciət etmişəm. Ancaq məni bu bəladan xilas edə biləcək bir üsul tapılmayıb". Keçən ay rentgen vasitəsilə qadını müayinə edən həkimlər bunun tibb dünyası üçün qeyri-adi bir hal olduğunu bildiriblər. Tibbdə bu tükləri "canavar tükləri" adlandırırlar. Onların çıxarılması üçün xəstəyə əməliyyat olunması təklif edilib. Amma müalicə ilə bəladan qurtara bilməyən Nursyaida bıçaq altına düşməkdən imtina edib. Yəqin, qadın bu üsulun da bir fayda verməyəcəyini düşünüb. Nursyaida tamamilə müalicə olunmasa, evlənmək haqda düşünməyəcəyini deyir. İndi o, dəmir tüklərin dərisini yaralamaması üçün xüsusi paltarlar tikdirmək məcburiyətində qalıb.


Mənbə: Həftə içi