İspaniyalı tədqiqatçılar yeni yuyucu toz icad ediblər. Bu yuyucu toz ev xanımlarından çox, qatillərin işini asanlaşdıracaq. Yeni kimyəvi maddə cinayət yerindəki qan ləkələrini tamamilə yox edir. Valensiya universitetindən olan bir qrup alim tərəfindən kəşf edilən məhsul qan izlərini məhkəmə ekspertizasının testlərində belə görünməyəcək şəkildə təmizləyir. Yeni təmizləmə məhsulunun tərkibində xlor əvəzinə oksigen var. Məhz oksigen hemoqlobinin izlərini silir. Üç nəfərlik qrupa başçılıq edən Fernando Verdu məhsulun dəlilləri ortadan qaldırmaq istəyən qatillər tərəfindən istifadə edilmə ehtimalı ilə əlaqədar olaraq bunları söyləyib: "Cinayəti törətmək asan, tutulmamaq isə çətindir. Qatillərin əksəriyyəti ağıllı deyil. Onların bu tozdan istifadə edəcəklərini sanmıram". Alimlərin yuyucu tozu nə məqsədlə kəşf etdiklərini anlamaq çətindir. Xüsusilə də bu alim cinayəti törətməyi asan sayırsa... Polis qatili aşkar etmək üçün hadisə yerindəki qanlı paltarları ipucu olaraq istifadə edir. Məhkəmə ekspertləri isə bəzi xüsusi kimyəvi maddələrdən istifadə edərək on dəfə yuyulmuş bir paltardakı qan izini belə aşkar edə bilirlər.



Mənbə: Həftə içi